Vaqif İbrahimoğlu
Vaqif İbrahimoğlu 18 oktyabr 1949-cu ildə Bakı şəhəri Mərdəkan qəsəbəsində anadan olmuşdur. 1967-ci ildə AzDMİİ-nin dram və kino aktyorluğu fakültəsinə daxil olmuş, 1972-ci ildə həmin institutu bitirmişdir. 1973-1976-cı illərdə Azərbaycan Dövlət Gənc Tamaşaçılar Teatrında aktyor vəzifəsində çalışmışdır. 1976-1979-cu illərdə Azərbaycan Teatr Cəmiyyətinin nəzdindəki Eksperimental teatr Studiyasında, 1979-1982-ci illərdə Tədris Teatrında Bədii rəhbər, 1982-1989-cu illərdə isə Azərbaycan Dövlət Musiqili Komediya Teatrında baş rejissor vəzifəsində fəaliyyət göstərmişdir.
Azərbaycan Milli Akademik Dram Teatrında, Türkiyənin Ankara və Bursa teatrlarında, Estoniyanın Uqala Teatrında tamaşalar hazırlamışdır. 1989-cu ildən «YUG» Teatrının Bədii rəhbəri vəzifəsində çalışmışdır (1992-ci ildə «YUG» Teatr-Studiyası dövlət statusu almışdır). Hal-hazırda «YUG» Dövlət Teatrının baş rejissoru kimi yaradıcı fəaliyyətini davam etdirir. 22 may 1991-ci ildə Azərbaycan Respublikasının Əməkdar incəsənət xadimi fəxri adı ilə təltif olunub. AzTXİ-nin təsis etdiyi «Qızıl Dərviş» mükafatı laureatı, AzDMİU-nun dosentidir. 2006-cı ildə Prezident mükafatına layiq görülmüşdür.
Vaqif İbrahimoğlu «YUG» Teatrında 1989-cu ildən bu günə qədər 80-ə yaxın tamaşaya quruluş vermişdir
2005-ci ilin iyul ayından etibarən “Narimanfilm” kinostudiyasının bədii – ekspert şurasının sədridir.
